Showing 867 results

1907 ޑިސެންބަރު 31(1325ހ ޒުލްގައިދު 25)ގާ، ވޯކާ ސަންޒް އެންޑް ކޮންޕެނީ ލިމިޓަޑް އިން، ކޮޅުނބުގާ ހުންނަ ދިވެހި ސަރުކާރުގެ އެންބަސީ އަށް ފޮނުވާފާވާ، 05/363 ރުޕީޒްގެ ބާކީ(ބެލަންސް)އޮތް، ނޮވެންބަރު 30ން ޑިސެންބަރު 19ޔަށް ވާ ހިސާބުކިތާބު ކަރުދާހެއް.
(Size: 10.55" x 8.25")
Sri Lanka - Walker Sons & Co. Ltd - Account

1908މ އޭޕްރިލް 4(1326ހ ރަބީލްއައްވަލް 2)ގާ، ކޮޅުނބުން، ވޯކާ ސަންޒް އެންޑް ކޮންޕެނީ ލިމިޓަޑް އިން، މޭރީ ކިޔާ ބޯޓަކުން، މރ. 'ޑީޑީ'ގެ ނަމުގާ، ރާއްޖެޔަށް ފޮނުވި މުދަލެއްގެ، އެކްސްޕޯޓް ފޯމެއްގެ ކޮޕީއެއް. އަދި ނުފުށުގާ، އެ ކުންފުނި ގެ އިޝްތިހާރެއް ވެއެ.
(Size: 8.6" x 5.56")
Sri Lanka - Walker Sons & Co. Ltd - Form(Package)

1908މ އޭޕްރިލް 4(1326ހ ރަބީލްއައްވަލް 2)ގާ، ކޮޅުނބުން، ވޯކާ ސަންޒް އެންޑް ކޮންޕެނީ ލިމިޓަޑް އިން، މޭރީ ކިޔާ ބޯޓަކުން، ރާއްޖެޔަށް ފޮނުވި މުދަލެއްގެ އެކްސްޕޯޓް ފޯމެއްގެ ކޮޕީއެއް. އަދި ނުފުށުގާ، އެ ކުންފުނި ގެ އިޝްތިހާރެއް ވެއެ.(Size: 8.65" x 5.65")
Sri Lanka - Walker Sons & Co. Ltd - Form(Package)

(ތާރީހެއް ނެތް)އައްސުލްތާނު މުހައްމަދު މުއީނުއްދީނު ކުލަސުންދުރަ ކައްތިރިބޮވަނަ މަހާރަދުން ފަނިކެންދޫގާ ހުރި ތަބްރީޒު މަގާމް ހަދާ، އެތަން ބެލެހެއްޓުމަށް، އެރަށު ގޮއިފާލަށްބައަށް ނުކުންނަ ކާއްޓާ، ރިއްސާ؟ ކޮޅުވަން، އެމަގާމުގެ ބޯގައަށް ލަށްވާ، ދެއްވި ފަތް ހަލާކުވެގެން، މަހްކަމަތުލް ޝަރިއްޔާއިން، އެ މަހްކަމާ(ޑިޕާޓްމެންޓް)ގެ 'ލެޓާހެޑް'ގާ، އެތާގެ ސިއްކަ ޖަހާފާ ދެއްވި އެ ބޯގަ ފަތުގެ، 1374ހ މުހައްރަމް 29(1954މ ސެޕްޓެންބަރު 27)ގާ، ކޮށްފާވާ ނަކަލެއް.
އަސްލުފަތުގެ ތާރީހު އިނގޭކަށް ނެތްކަމުގާ މިކަރުދާހުގާ ބަޔާންކޮށްފާ ވެއެ.
B - Kendhoo - Endowment for Shrine (ziyaaraiy)

1908 މޭ 30(1326ހ ރަބީލްއާހިރު 29)ގާ، ޝްރީލަންކާގާ ހުންނަ، ރާއްޖޭގެ ސަފީރު، އަބްދުލް ހަމީދު ދީދީ މާލެ ބޮޑުބަނޑޭރިގެޔަށް؛ ބަނޑޭރިގެއިން، އަބްދުލް ހައިނީ ޝެއިހު ޖީވަންޖީގެ 'ޖަންދަރުން' ފޮނުއްވި، ރަބީލްއާހިރު 22ގާ، މަލިކު މީހުންގެ ހަބަރު ލިޔުއްވާފާވާ ސިޓީޔާ، މޫސާ ބަހީގެ ބަނޑަހަލުގެ -/1000 ރުފިޔާގެ ހުންޑީ ލަށްވާފާވާ ދެ ސިޓީޔާ، އެ ހުންޑީޔާ، މޭ 29ގާ ލިބިއްޖެ ކަމާ، އެ ސިޓީ ތަކުގާ ހުރިގޮތަށް ކަންތައް އެބަ ކުރަށްވާކަމާ، މިކަންކަން ބުނެ؛ ފޮނުވާފާވާ ސިޓީއެއް.
(Size: 10.2" x 7.85")
Sri Lanka - Maldivian Embassy - letter(Official)

(އަހަރެއް ނެތް)..19 ޖޫނު 3، ތާރީހުކޮށް، ޝްރީލަންކާގާ ހުންނަ، ރާއްޖޭގެ ސަފީރު، އަބްދުލް ހަމީދު ދީދީ މާލެ ބޮޑުބަނޑޭރިގެޔަށް؛ 'ސިއްރުސިޓީ' މިހެން މަތީގާ ޖަހާ، ކޮޅުނބުގާ ތިއްބެވި، އެއްގަމުގޭ އަލީ ދީދީ އާއި އަބްދުއްލޯ ދީދީއަށް، އެއްފަހަރާ -/3000 ރުފިޔާ އައި ކަމުގެ ހަބަރު، ހަމީދު ދީދީ އަށް ލިބުނު ކަމާ، އެގޮތަށް އެތަށްފަހަރަކު ފައިސާ ލިބޭ ކަމާ، އަދި، އެދެބޭފުޅުން، ޖަވާހިރު ބައްލަވައިގަނެގެން ބަންގާޅަށް ވަޑައިގަންނަވަން އުޅުއްވާހެން ހީވާކަމުގެ ވާހަކަ އިވޭކަމާ، އެކަންތައްތައް އެވަނީ ސަރުކާރަށް ސިއްރުން ކަމާ، ކެނޑިނޭޅި އެބޭފުޅުންނަށް ސިޓީވެސް ދާ ކަމާ، އެހެންވެ، އެއްގަމުގެޔަށް ބަނޑޭރި ބޭކަލުން ފޮނުއްވައިގެން، ގޯތިތެރެޔާ އެއްކޮށް، ހުރިހާ ތަނެއް ރަންގަޅަށް ހޯދާ ބެލުން އެއީ އޭނާޔަށް ފެންނަކަމެއް ކަމުގަޔާ، އަދި މިކަމާ ހުސިޔާރުވެ، އެކަން މަނާވާނެ ގޮތެއް ހޯދަންވެއްޖެ ކަމުގަޔާ، އަދި ފައިސާޔާ، ސިޓީ ދަނީ މޫސާ ބަހީގެ ބޯޓުން ކަމުގާ ހީވާކަމާ، އެހެންވެ އޭނާގެ ބޯޓެއް ދަތުރަށް ވެގެން ފުރުމުން، ބަނޑޭރިގޭން މީހުން ފޮނުވާ އެބޯޓަށް އަރާ، ހުރިހާ ކަލާސީން(ބޯޓުގެ ފަޅުވެރިން)ނާ، ނަކުވާ(ބުންބާ ބޯޓުގެ ނެވިމީހާ)ޔާ މައްޗަށް ގެންގޮސް ރަންގަޅަށް ބޯޓު ބައްލަވާ ހަށްދަވަން، އޭނާޔަށް ފެންނަކަމާ، ފިހާރައިން ދާ ސިޓީޔާ، ފޮށިފޮށްޓާ، ފާސިންޖޯރަކު(ޕެސެންޖަރަކު) ދާނަމަ، އެމީހާގެ ފޮށްޓާ ސާމާނަ ބެއްލެވުމާ، އެގޮތުން އެއެއްޗެތި ފެނިދާނެކަމުގާ ހީވާ ކަމާ، އަދި ފިހާރަ ސިޓީ، އެ ފިހާރައިގެ މުނިމް(ހިސާބު ބަލާ މީހާ؟؟)ލަށްވާ ކަނޑާ، ކިޔަން ދަންނަ މީހަކު ލަށްވާ ކިޔުއްވާ، ހުންޑީއެއް ވާނަމަ، ގުޖުރާތީ ދަންނަ މީހަކަށް ދެއްކެވުމާ، މިކަންކަންވެސް ކުރަށްވަން އޭނާޔަށް ފެންނަކަމާ، ފެނިވަޑައިގަންނަވާ ރަންގަޅު އެހެންގޮތަކަށް ނަމަވެސް މިކަންތައް ކުރަންވެއްޖެ ކަމުގާ ލަފާދެއްވާ؛ ލިޔެފާވާ ސިޓީއެއް.
(Size: 10.1" x 7.85")
Sri Lanka - Maldivian Embassy - letter(Official)

(ތާރީހެއް ނެތް)، ޝްރީލަންކާގާ ހުންނަ، ރާއްޖޭގެ ސަފީރު، އަބްދުލް ހަމީދު ދީދީ(ސޮއިއަށް ބަލާފާ)، މާލެ ބޮޑުބަނޑޭރިގެޔަށް؛ މޫސާ ބަހީގެ ހައިދަރީ އިން ފޮނުއްވި، ޖުމާދިލްއާހިރު މަހު 20ގާ ލިޔުއްވާފާވާ ސިޓީއާ، ދަގަނޑު ކީހާ ތިލަބުރިޔެއް، ލިބުނު ކަމާ، އަހު؟(އަސް)ކާ ސާމާނާޔާ، ކާށިތެލާ ފޮނުވަން ލަސްވީ، ކަރާ(ޝްރީލަންކާ؟؟)ގެ، ސުލްތާނު ކިޔާ ބޯޓަށް އެ ސާމާނުލާ، އެ ބޯޓު ޖޫނު 12ގާ ފުރިނަމަވެސް، 40 ދުވަހު ކަނޑުމަތީއުޅެފާ، ނުދުއްވިގެން އަނބުރާ ގޮސް، އަދި 3 ދުވަހު ބަނދަރުގާ އޮވެފާ، ދެން ފުރައިގެން ދިޔުމުން ވީ ލަހެއް ކަމާ، ބަންގާޅުގާ، ކާށީގެ އަގަކީ 20 ރުފިޔާ ކަމާ، ހަނޑުލުގެ އަގު އަދިވެސް ދަށްނުވާ ކަމާ، އަދި ކޮޅުނބުގާ މަހުގެ އަގުހުރީ 33-34ގާ ކަމާ، ޖުލައި 22ގާ ފުރި، ކަރީމު؟(ވީދިގެން ކިޔަން ނޭނގޭ)ޖީގެ 'ޑޭލާ' އިން ވެޔޮދޮށުގޭ އިބްރާހީމް މަނިކުގެ ހަވާލުގާ، ލަކުޑިޔާ، ކޮންނަބޯޓުގެ ސާމާނާ، ޑައިނަމައިޓް ފޮނުވި ކަމާ، ހައިދަރީން ދަނގަނޑު ކީހާ 12ކީސްތިލަ ފޮނުވާނެ ކަމާ، އަދި ފުލުހުންނަށް ކޭ.މިސްކީނު ކިޔާ ސޯޅިޔާއެއް ފުލުހަށް ފޮނުވާފާވާ ސިޓީއެއްގެ ކޮޕީއަކާ، އެ ސިޓީއާ ހަވާލާދީ ފުލުހުންގެ ވެރިޔާ ފޮނުވި ސިޓީއާއި، ސަފީރު، އެޔަށް ދެއްވި ޖަވާބުގެ ކޮޕީއާ(N-15،N-15A )ވެސް މިސިޓީއާ އެކު ފޮނުވާ ކަމާ، އެސިޓީގާ އޮތް ކަންތައް ބަލާ، އެކަންތައް ވެފާއޮތް ގޮތެއް، ވީހާވެސް އަވަހަކަށް އެންގުވުމަށާއި، މިކަންކަން ބަޔާންކޮށް؛ ފޮނުވާފާވާ ސިޓީއެއް.
(Size: 10.1" x 7.85")
Sri Lanka - Maldivian Embassy - letter(Official)

1908 އޭޕްރިލް 30(1326ހ ރަބީލްއައްވަލް 28)ގާ، ޝްރީލަންކާގާ ހުންނަ، ދިވެހި އެންބަސީއިން، ރާއްޖޭގެ ސަފީރު، އަބްދުލް ހަމީދު ދީދީ، އޭނާގެ ރަސްމީ 'ލެޓާހެޑް'ގާ، މާލެ ބޮޑުބަނޑޭރިގޭ ބޭފުޅުންނަށް؛ މަތީގާ 'މިދާ ޔޫސުފް ބަހީގެ ސަފްދަރީން ސަރުކާރަށް ފޮނުވާ ތަކެތީގެ ހިސާބު-'، މިހެން ސުރުހީކޮށް، އެ އުޅަދުން ފޮނުވާފާވާ ތަކެތީގެ ލިސްޓެއް.(N-59ގާ، ބުނެފާވާ)
(Size: 10.1" x 7.85")
Sri Lanka - Maldivian Embassy - list(Package)

1908 އޭޕްރިލް 30(1326ހ ރަބީލްއައްވަލް 28)ގާ، ޝްރީލަންކާގާ ހުންނަ ދިވެހި ސަފީރު، އަބްދުލް ހަމީދު ދީދީ، އޭނާގެ ރަސްމީ 'ލެޓާހެޑް'ގާ، މާލެ ބޮޑުބަނޑޭރިގޭ ބޭފުޅުންނަށް؛ މަތީގާ '-ޔޫސުފް ބަހީގެ ސަފްދަރީން-'، މިހެން މަތީގާ ލިޔެ، މިލަދޫގޭ އަލިމަނިކު އަތުގާ ފޮނުއްވި، އެ އޭޕްރިލް މަހު 10ގާ ލިޔުއްވާފާ ވާ ސިޓީޔާ އަދި ސަރުކާރުގެ -/3000 ރުފިޔާ ހަމަޔަށް ލިބުނު ކަމާ، އަދި 'ވާކަރާ'(ވޯކާ) ވާހަކަދަށްކައިގެން، އެ އަލިމަނިކު އާއި ހަސަނާ، އެތާގެ ކޮންނަބޯޓަކަށް، އެއެތިފަހަރު ހިންގާ، ގެންގުޅެން ދަސްކުރުމަށްޓަކާ ފޮނުވުމުން، އެމީހުން ގޮސް އެއީ މާލޭގާ އޮތް އެއްޗާ މުޅިން ތަފާތު އެއްޗެއް ކަމުގަޔާ، އެވަށްތަރުގެ އެއްޗެއް ދަސްކުރުމުގެ އެއްވެސް ބޭނުމެއް ނެތް ކަމާ، ޝްރީލަންކާ ސަރުކާރުން އެތަމްރީނު ދިނުމަށް ތައްޔާރަށް ތިބިކަމުގާ ވިޔަސް، އެތާގާ، މާލޭގާ އޮތްކަހަލަ ކޮންނައެތިގަނޑެއް ނެތްކަމުގަޔާ، އަދި މާލޭގާ އޮތް ކޮންނައެތި ވަކިވަރަކަށް ވުރެން ގިނައިން، އަދި އެކި ބާރުމިނުގާ ހިންގައިފިއްޔާ، އޭތި އަވަހަށް ހަލާކުވާނެކަމުގާ ވާކަރު(ވޯކާ) ލަފާދިންކަމާ، އަދި އޭގެ އިތުރުން، ގަންނަން އަންގާފާވާ ސާމާނު، އަލިމަނިކުމެން ދެމީހުންގެ ހަވާލުގާ، ސަފްދަރީން ފޮނުވާ ކަމާ، މިސިޓީއާއެކު، އެތަކެތީގެ ހިސާބު ފޮނުވާކަމާ، އަދި، ފޮނުވި، މާލޭ ކޮނުނުއިރު ފެނުނު ހިލަގާކޮޅުތައްވެސް ލިބި، އަދި އެގާތަކުތެރޭގާ، ވަރަށް ހުދުކޮށް، އޮތް ގާކޮޅު އެތާ މީހުންނަށް ދެއްކުމުން، އެކަހަލަ ގާ ހުރިތާކު ޖަވާހިރު ހުންނާނެކަމުގާ، ސިލޯނުގެ މީހުން ބުނިކަމާ، އެހެންކަމުން، ނެގޭ، އެޒާތުގެ ގާ ވަކިން ބެހެއްޓުމަށް ފެންނަކަމުގަޔާ، އަދިވެސް އެ ހިލަގާ ބަލާ، ފައިދާއެއް ހުރިއްޔާ، އަންގާނެ ކަމުގަޔާ، އަދި، އޭގެ އިތުރުން، ސަރުކާރުން، އާގުބޯޓެއް ދުއްވައިފިއްޔާ ފައިދާވާނެ ކަމުގާ ފެންނަކަމާ، އަދި އެވާހަކަ ވާކަރާ ދެއްކުމުން، އެމީހުންގެ 'ލޭޑީ ގޯޑަން' ކިޔާ ބޯޓު، އަހަރުދުވަހުގެ ޗާޓާރަށް، މަހަކު -/7500 ރުފިޔާއަށް ދީފާނެކަމުގާ ބުނިކަމާއި، ދެއްޔާ، ބަނދަރު-ހަރަދު ސަރުކާރުން ދެއްވާ، އެހެން ހުރިހާ ހަރަދަކާ 'ނޮކުސާނު'(ނުކުސާން/އުނދަގޫ؟؟) އެމީހުން އުފުލާނެކަމުގަޔާ، އެހެންވިއްޔާ އަހަރަކު ގިނަވެގެން ދާނީ 1ލައްކަ ކަމާ، އޭރުން -/70،000 ސަލާމަތް ކުރެވޭނެ ކަމާ، ބޯޓެއް ބަނދެއްޖެއްޔާ، އާހިރުގާ ހަރަދު ކުޑަވާނެކަމުގަޔާ، އެކަމަކު، ފުރަތަމަ ފަށައިގަނެ، އަހަރެއްހާދުވަސްވަންދެން، އަޖުމަބަލައިލަން ދުއްވަން، ރަންގަޅުވާނީ ކުއްޔަށް ހިފުންކަމުގާ ކަމާ، އަދި ޖޫނު 10ގެ ކުރީ ޖަވާބެއް ދިނުމަށާ، ކުއްޔަށް ހިފާނަމަ، ރަނގަޅަށް މަރާމާތުކޮށް، އޯގަސްޓް 1ގާ ހަވާލުކުރާނެ ކަމުގާ، ވާކަރުމެން ބުނިކަމާ، ބަރާކުރާނެ މުދާވެސް ލިބޭނެކަމުގަޔާ، އެހެން އެކަން ކުރުމުން، އެބަޔަކަށް އެކަނި މުދާ ބަރާކުރުމުގެ ކަންތައް ދިނުމުން، ސަރުކާރަށް އެތައް ހާސް ރުފިޔާއެއް ދީފާނެކަމުގާ ބުނެ، އެކަމުން ކުދި ވިޔަފާރިވެރިން ނައްތާލުމަށް އުޅޭ ބުންބާ މީހުން ކިބައިން ސަލާމަތް ވާނެކަމުގަޔާ، އިތުރު ފައިސާ ދެން ފޮނުވާނީ، އެންގުމުން ކަމާ، މި ހުރިހާ ކަންކަމެއް ބަޔާންކޮށް؛ ލިޔެފާވާ ސިޓީއެއް.
(Size: 10.1" x 7.85")
Sri Lanka - Maldivian Embassy - letter(Official)

1908މ މޭ 24(1326ހ ރަބީލްއާހިރު 23)ގާ، ޝްރީލަންކާގާ ހުންނަ ދިވެހި ސަފީރު، އަބްދުލް ހަމީދު ދީދީ، މާލެ ބޮޑުބަނޑޭރިގޭ ބޭފުޅުންނަށް؛ މަތީގާ '-އީ.ޖީގެ ދީނުގަންޖާއިން-'، މިހެންލިޔެ، ޝްރީލަންކާއަށް ރާއްޖޭން ގެންދާ މަސް ހުންނަނީ، މަސްގަނޑު މާބޮޑަށް ކަނޑާ، ރަނގަޅަށް ނުހިއްކާ، ކަށިވެސް ނުފިލުވާ ކަމުން، އެ މަހުގެ 'އިއްޒަތް' ދެރަވެ، ރަނގަޅު އަގު ނުލިބޭތީވެ، މަސް ގެންދާ ހުރިހާ ސޭޓުންނާ އަދި އެރަށުގެ މަސްގަންނަ 'ސަންމާންކާރު'ންނާ އޭނާ އެވާހަކަ ދެއްކުމުން، އެމީހުންވެސް އެކަން ވަނީ އެހެން ކަމުގާ ބުނާ ކަމާ، ރާއްޖޭން ބޭރުވާ މަހަކީ، އޭގެ ބޮޑުބައެއް ޝްރީލަންކާޔަށް ގެންދާ މަސް ކަމުގަޔާ، އަދި ޝްރީލަންކާ ސަރުކާރުން، ބޭރު އެހެން ގައުމުތަކުން ދިރޭ މަސް ގެނެސް، އެތާގެ ކޯރުކޯރަށާ ފެންފެންގަނޑަށް ލާ އެ އާލާކުރަން ވާހަކދަށްކަމުން ގެންދާ ކަމާ، ރާއްޖޭގެ މަހުގެ ފެންވަރު ދައްވަންޏާ، އާހިރުގާ ރާއްޖެޔަށް ވެދާނެ ގެއްލުމާ، ރާއްޖޭގެ މަސްވެރިންނަށް އެކަން ނުވިސްނޭތީވެ، ސަރުކާރުން، ކަމާބެހޭ އަމުރެއް ނެރުއްވުމަކީ ރަނގަޅުވާނެ ކަމެއްކަމުގާ ދެކޭ ކަމާ، އަދި މޫސާ ބަހީގެ ހައިދަރީން، ތިރިނާކޮޅަށް ސާމާނުލީ ދުވަހު ހަލާކުވީ ހެންވޭރު ގަނޑުވަރުގެ ހަތަބުކޮޅުގެ ބޮލާ، އާ ގޮނޑިޔަކާ، އަދި އިތުރު ފޮށިގަނޑެއް ފޮނުވި ކަމާ، ބަންގާޅުގަޔާ އަދި ސިލޯނުގާ ކާށްޓާ ކާށިތެލުގެ އަގު ދަށްވެއްޖެ ކަމާ، = ކުރިޔަށް އޮތް އަހަރު ބަންގާޅުގާ ހަނޑޫ ހަށްދާލޭ ގިނަވާނެ ކަމުގެ ވާހަކަ އިވޭ ކަމާ، ސުތުލިން ލިބުނު ގެއްލުން ބޮޑުކަމުން، ސުތުލި ހެއްދި މީހުންވެސް އެއަހަރު ހަށްދާނީ ހަނޑޫކަމުގަޔާ، ބަންގާޅު ސަރުކާރުންވެސް އެކަމާ އުޅޭކަމާ، އަދި ކަރާޗީގާ ހަނޑުލުގެ އަގު، 44-45ށް ކަނޑިއެއް(3 ނާޅި/3ކިލޯ) އަރައިފިކަމާ، އަދި ބަންގާޅުގާ ގަޑުބަޑު ވަރަށް ބޮޑުކަމާ މިއެންމެހާ ކަންކަން ބަޔާންކޮށް؛ ލިޔެފާވާ ސިޓީއެއް.(Size: 10.15" x 7.9")
Sri Lanka - Maldivian Embassy - letter(Official)